U18 landslið Íslands hefja keppni á Evrópumóti CEV

U18 stúlkna landsliðið hóf í dag, 1. júlí, keppni á lokamóti CEV U18 Evrópumótsins sem fer fram í Riga í Lettlandi. U18 drengja landsliðið heldur svo til Porto San Giorgio á Ítalíu á sunnudaginn þar sem keppni hefst 7. júlí.

Lokamótið er skipað þeim landsliðum sem tryggðu sér sæti í gegnum undankeppni Evrópumótsins. Ísland vann sér sæti á lokamótinu með sigri á SCA-mótinu í janúar. Þetta er í fyrsta sinn sem íslenskt landslið tryggir sér þátttökurétt á lokamóti Evrópumótsins út frá árangri þeirra í undankeppni.

U18 stúlkna landsliðið

U18 stúlkurnar héldu til Riga mánudagskvöldið 29. júní og mætti sterku liði Ítalíu í fyrsta leik sínum í morgun. Ísland leikur í riðli með Ítalíu, Lettlandi, Tékklandi, Spáni, Belgíu, Tyrklandi og Póllandi. Fram undan eru því spennandi og krefjandi verkefni gegn nokkrum af sterkustu U18 landsliðum Evrópu. Að lokinni riðlakeppni komast tvö efstu lið riðilsins áfram í undanúrslit mótsins.

Leikjadagskrá Íslands má sjá á meðfylgjandi myndum.

U18 drengja landsliðið

U18 drengja landsliðið heldur til Ítalíu sunnudaginn 5. júlí þar sem fyrsti leikur Íslands fer fram þriðjudaginn 7. júlí gegn Póllandi.

Ísland leikur í riðli með Ítalíu, Póllandi, Slóveníu, Finnlandi, Grikklandi, Tyrklandi og Serbíu. Riðlakeppnin stendur yfir til 15. júlí og komast tvö efstu lið riðilsins áfram í undanúrslit. Leikjadagskrá Íslands má sjá á meðfylgjandi myndum.

Blaksamband Íslands óskar U18 stúlkna- og drengja landsliðunum og öllu föruneyti þeirra góðs gengis á Evrópumótinu og hlakkar til að fylgjast með þeim etja kappi við bestu U18 landslið Evrópu.