Skráning opin í Kjörísbikarinn og nýjan Deildarbikar BLÍ
Skráning er nú hafin í tvær útsláttarkeppnir BLÍ fyrir tímabilið 2026–2027, Kjörísbikarinn 2027 og Deildarbikarinn, nýja keppni fyrir lið í neðri deildum.
Kjörísbikarinn 2027
Kjörísbikarinn er opinn félögum innan BLÍ og eru öll lið í Unbrokendeildum sjálfkrafa skráð til leiks. Önnur lið þurfa að skrá þátttöku sérstaklega.
Skráningarfrestur er til föstudagsins 9. október.
Dregið verður í 16 liða úrslit fyrir 14. október, ef nægileg skráning næst í þá umferð.
Áætluð tímasetning keppninnar er:
- 16 liða úrslit:23. október – 1. desember 2026
- 8 liða úrslit:22. janúar – 10. febrúar 2027
- Undanúrslit og úrslit:17.–20. mars 2027 í Digranesi
Skráningargjald er 45.000 kr. og gengur það upp í þátttökugjald fyrstu keppnisumferðar liðsins. Hvert lið greiðir að hámarki 150.000 kr. samtals vegna þátttöku í keppninni.
Skráning í Kjörísbikarinn 2027
Ný keppni – Deildarbikarinn
Í vetur verður í fyrsta sinn keppt í Deildarbikarnum, nýrri útsláttarkeppni fyrir karla- og kvennalið í neðri deildum.
Markmiðið með keppninni er að fjölga keppnistækifærum fyrir iðkendur neðri deilda og bjóða liðunum upp á annars konar keppnisform en hefðbundnar mótshelgar. Spilaðir verða stakir leikir þar sem þarf að vinna þrjár hrinur þar sem sigurvegari heldur áfram keppni en tapliðið er úr leik.
Skráningarfrestur er til 22. október og verður dregið í fyrstu umferð í lok október.
Í upphafi verður liðunum skipt í SV- og NA-hluta til að draga úr ferðalögum. Fjöldi umferða fer eftir skráningu og verða fyrstu umferðir leiknar frá 1. nóvember til 1. mars. Lið sem dragast saman fá tveggja vikna tímabil til að koma sér saman um leikdag.
Keppnin er ætluð leikmönnum neðri deilda. Leikmenn sem spila í 1. deild eða Unbrokendeildum hafa ekki þátttökurétt. Sama gildir um U20 leikmenn sem spila með tveimur liðum sama félags.
Lið í Deildarbikarnum þarf ekki að vera sama lið og tekur þátt í Íslandsmótinu. Félög geta sameinað leikmenn úr fleiri en einu deildarliði og mega jafnframt skrá fleiri en eitt lið til keppni. Að lágmarki þurfa 10 leikmenn að vera skráðir í hvert lið og hver leikmaður má aðeins leika með einu liði í Deildarbikarnum.
Þau fjögur lið sem komast lengst leika á sameiginlegri úrslitahelgi 19.–21. mars 2027, þar sem leikið verður um bæði gull- og bronsverðlaun. Úrslitaleikir karla og kvenna fara fram í Digranesi sunnudaginn 21. mars.
Skráningargjald er 20.000 kr., þátttökugjald fyrir hverja umferð er 20.000 kr. og þátttökugjald á úrslitahelgi er 45.000 kr. á lið. Hvert lið greiðir að hámarki 100.000 kr. samtals.
Skráning í Deildarbikarinn 2026–2027
BLÍ hvetur félög til að kynna sér báðar keppnir og nýta þau auknu keppnistækifæri sem í boði verða í vetur.