Glæsilegur árangur íslensku liðanna í Cardiff

Ísland átti tvö kvennalið á U17 SCA strandblaksmótinu sem fór fram í Cardiff í Wales dagana 1. – 2. ágúst. Mótið var undankeppni fyrir Evrópumót U18 í strandblaki árið 2027. Aðalheiður Guðmundsdóttir og Þorbjörg Rún Emilsdóttir stóðu uppi sem sigurvegarar mótsins, en Bergþóra Emma Sigurðardóttir og Ása Margrét Kristjándsóttir enduðu í 4. sæti eftir sterka frammistöðu alla helgina.

Alls tóku 10 lið þátt kvennamegin og var þeim skipt í tvo 5 liða riðla. Íslensku liðin voru í sitthvorum riðlinum og fóru taplaus í gegnum riðlakeppnina. Aðalheiður og Þorbjörg unnu alla fjóra leikina sína 2-0 og tryggðu sér efsta sætið í sínum riðli. Bergþóra og Ása gerðu slíkt hið sama, unnu alla sína fjóra leiki í tveimur hrinum og enduðu efstar í sínum riðli.

Með efsta sætinu tryggðu bæði íslensku liðin sér sæti í undanúrslitum. Þar mættu Aðalheiður og Þorbjörg liði Írlands og unnu öruggan 2-0 sigur. Bergþóra og Ása mættu hins vegar Færeyjum og töpuðu 0-2.

Í úrslitaleiknum mættu Aðalheiður og Þorbjörg því Færeyjum og héldu áfram á sömu braut. Þær unnu leikinn 2-0, tryggðu sér gullverðlaunin og luku mótinu án þess að tapa hrinu. Bergþóra og Ása léku við Írland í leiknum um 3. sæti. Þar höfðu írsku stelpurnar betur og íslenska parið hafnaði því í 4. sæti. Þær áttu engu að síður frábært mót þar sem þær unnu fjóra af sex leikjunum sínum og fóru taplausar í gegnum riðlakeppnina.

Með sigrinum tryggðu Aðalheiður og Þorbjörg Íslandi þátttökurétt á lokamóti Evrópumóts U18 í strandblaki árið 2027. Þetta er jafnframt þriðja íslenska liðið sem tryggir Íslandi þátttökurétt á lokamót Evrópumóts. Fyrr í sumar tryggðu Svanur og Sölvi Hafþórssynir Íslandi þátttökurétt í U20 karla og Sóldís Júlía Sigurpálsdóttir og Helena Kristjánsdóttir tryggðu Íslandi þátttökurétt í U20 kvenna.

Blaksamband Íslands óskar Aðalheiði, Þorbjörgu, Bergþóru og Ásu innilega til hamingju með glæsilegan árangur.