Fulltrúar Blaksambands Íslands sóttu þjálfararáðstefnu CEV í Portúgal

Dagana 12. – 14. júní fór árleg þjálfararáðstefna Evrópska blaksambandsins, CEV, fram í Viana do Castelo í Portúgal. Fyrir hönd Blaksamband Íslands tóku Daníela Grétarsdóttir, Erla Marín Guðmundsdóttir, Pedro D. Dupuy Del Lome Nashimento og Valgeir Valgeirsson þátt í ráðstefnunni.

Ráðstefnan safnaði saman blakþjálfurum víðs vegar að úr Evrópu og gaf þátttakendum tækifæri til að sækja fyrirlestra, verklegar æfingar og vinnustofur þar sem áhersla var lögð á þróun blakþjálfunar, kennsluaðferðir og miðlun þekkingar milli þjálfara frá ólíkum löndum.

Meðal fyrirlesara voru Mark Lebedew, John Kessel og Rosana Krajnc. Fjallað var meðal annars um mikilvægi þess að byggja upp æfingar sem líkjast raunverulegum leikaðstæðum, skapa jákvætt umhverfi og efla leikgleði iðkenda. Einnig var lögð áhersla á að þjálfun væri bæði markviss og skemmtileg, sérstaklega í yngri flokkum, þar sem markmiðið er ekki aðeins að þróa leikmenn heldur einnig að viðhalda áhuga þeirra á íþróttinni.

Þátttakendur fengu einnig kynningu á fjölbreyttum æfingum og kennsluaðferðum sem nýtast vel við uppbyggingu blakæfinga fyrir leikmenn á ólíkum aldri og getustigi. Rosana Krajnc kynnti jafnframt fjölbreyttar æfingar á sviði styrktar-, snerpu- og hreyfiþjálfunar sem er auðvelt að aðlaga að mismunandi æfingum og krefjast lítils búnaðar.

Einn af hápunktum ráðstefnunnar var alþjóðleg hópavinna þar sem þátttakendur voru settir saman í hópa með þjálfurum frá mismunandi löndum. Hver hópur vann saman að því að skipuleggja og kynna æfingu þar sem þátttakendur fengu tækifæri til að deila reynslu, kynnast ólíkum hugmyndafræðum og læra hver af öðrum. Slík samvinna skapaði verðmæt tengsl sem geta leitt til áframhaldandi samstarfs milli félaga og landa í framtíðinni.

Íslensku fulltrúarnir snéru heim með fjölmargar nýjar hugmyndir sem nýtast í daglegu þjálfarastarfi og hafa þegar hafið innleiðingu á ýmsum þeirra í eigin þjálfun. Þátttaka í ráðstefnum á borð við þjálfararáðstefnu CEV er mikilvægur liður í endurmenntun þjálfara og styður við áframhaldandi þróun blaks á Íslandi.

Blaksamband Íslands þakkar CEV fyrir vel heppnaða ráðstefnu og tækifærið til að taka þátt í öflugri þekkingarmiðlun og samstarfi með þjálfurum alls staðar að úr Evrópu.